AREP PAWE

esuk udan nyiram badan
bumi teles remesep
srengenge angel mlethek
katutup mendung selangit

sapa kae ngawe-ngawe bocah gunung
aseng pawe neng alun-alun
mengeti dina agung tumrap wong banyumas
"hari jadi" sing urung dadi

esih dadi polemik

gelar panggung ngarep pendhapa
melu pawe seneng sewetara
klalen butuh golet butuh
sapa ngerti nemu rejeki
kena kanggo sangu nyukupi urip

arep pawe karepe sapa
sapa kae baris ngawe-ngawe
pawe gawe seneng sapa
sapa bakal seneng anane pawe
"hari jadi" urung nunggal budi
esih dadi penggalih para winasis
rembug kapan sing temtu temenan
nitis lair "hari jadi" banyumas

arep pawe sapa sing ngawe-ngawe
ora melu riwe-riwe ati tetap kecawe

benang lawe tiba nangsang
nangsang telu jiret pecut
arep pawe atine grungsang
ora melu atine kepencut

kracak 07042013

NONTON EBEG

bleketaket onine gendhing eling-eling

gela gelo maju mundur ndhat ndhut  ebeg ngibing

akeh sing nonton

lanang wadon

tua nom

gedhe cilik

jejer ndarik

bakul plendhungan thoat-thoet

bakul pecel ider golet rejeki pating sliwer

ning nong ning nep

ning nong ning gung

ebeg wuru sing nonton seneng

tambah umyeng surak bareng

eling-eling gendhing pangiring

sesenggakan sindhen lan penayagan

ebeg wuru mangan beling

wong wadhon weruh cincing-cincing

merek bocah nangis njempling

ning nong ning nep

ebeg wuru mlayu mlayu

matane mendelik awak ngececeng tangane kaku

umah gedhong cete biru

biru ireng kathon wagu

ana ebeg padha wuru

sing nanggap seneng mesem guyu

gendhing eling eling

ebeg ngibing ana sing guling

mangan pari kambi ngibing

kolang kaling garing klinthing

godhong waru layu kuning

eling eling padha sing eling

sawise wuru sadar maning

ebege mbigar kringet byuk-byukan

gulu ngelak pengin nginum

tilang tileng nubruk dawegan

gep wetenge teles atine adem

Pendapa Wabub Bms13062013

BUDAYA JAWA

Inyong sapa rika sapa  

Mau bengi ngimpi apa

Jagong bareng neng “cipta rasa”

Rika crita basa sastra lan aksara jawa

Ana lawa nyucuk ganyong

Nyenggol ramat  uwit nangka

Basa jawa basa inyong

Ayuh derumat  kon dadi kangwong

Perda njeprah aturan njacrah

Kepenginan mambrah-mambrah

Kanggo memetri basa kambi sastra jawa

Ningen tingkah polah esih nggedabyah neng bebrayan

Adoh karo gegayuhan

Jere pendidikan “berkarakter”

Malah akeh bocah keblinger

Rika sapa inyong sapa

Pandeng-pandengan gendhu-gendhu rasa

Saling asah asuh asih golet kecik ngelmu luhur

Ling kineling sambung rasa

Rembug budaya neng bebrayan

Ngidek beling buri sepur

Sepur  dhuwur nabrak guwa

Padha eling ayuh sedulur

Junjung dhuwur budaya jawa

Eling eling sing eling balia maning

Ngemu ngening luhur budi

Mungguh budaya jawa misuwur

Nutur beton tudungan payung

Agi nggeneni karo suluh runtah

Tuwa enom ayuh  nyengkuyung

Aja ngenteni prentah pamarentah

Nylinguk ngiwa nyangking kanthong

Nyangklong panci dupak bangkong

Budaya jawa budayane inyong

Aja ngasi decolong ngewong

Purwakerta 18062013